जीतपुरसिमराले खातामा सिधै तलब पठाउन थालेपछि शिक्षकहरुमा उत्साह

नयाँ इतिहास

१ महिना अघि

पाठक संख्या ९०३

सिमरा : बाराको जीतपुरसिमरा उपमहानगरपालिकाले जिल्लामै पहिलोपटक शिक्षकको खातामा सिधै तलब पठाउन शुरु गरेको छ । 

यसअघि मासिक रुपमा विद्यालयको खातामा तलब निकासा गर्दै आएको उपमहानगरले फागुनदेखि शिक्षककै खातामा सिधै तलब निकासा हुने व्यवस्था मिलाएको छ । 

उपमहानगरपालिकाका शिक्षा अधिकृत खुलप्रसाद गौतमका अनुसार सोमबार सबै शिक्षकको माघ महिनाको तलब ब्यक्तिगत खातामा निकासा भइसकेको छ । यसअघि उपमहानगरपालिकाले विद्यालयको खातामा तलब पठाउने गरेको थियो ।

विद्यालयको खातामा उपमहानगरपालिकाले पठाएको पैसा फेरि शिक्षकको खातामा पठाउन प्रधानाध्यापकहरुले एकसातासम्म लगाउने गरेका थिए । लेखापाल नभएका आधारभूत विद्यालयका प्रधानाध्यापकहरुलाई तलब निकासा अतिरिक्त बोझका रुपमा रहेको थियो । 

नेपाल राष्ट्रिय शिक्षक संगठन बाराका नेता बरुण गौतमका अनुसार विद्यालयको खातामा आएको पैसा पनि कतिपय विद्यालयका प्रधानाध्यापकले आफ्नो ‘मुड’ अनुसार शिक्षकको खातामा पठाइदिन्थे । ‘काम गरेको पारिश्रमिक लिन प्रधानाध्यापकको भरपर्नुपर्ने बाध्यतामा भएका शिक्षकहरु उपमहानगरको कार्यबाट खुशी छन् ।’ जनता मावि रजघट्टाका सहायक प्रधानाध्यापक समेत रहेका गौतमले नयाँ इतिहाससंग भने । 

नेरामावि फतेपुरकी मावि शिक्षक लिला दाहालले सामाजिक सञ्जालमा छुट्टै खुशीको अनुभूती भएको उल्लेख गर्दै उपमहानगरलाई धन्यवाद दिएकी छिन् । ‘पहिलोपटक शिक्षकहरुको मासिक तलबभत्ता शिक्षकहरुको खातामा दाखिला गरिदिनुभएकोमा उपमहानगरपालिकालाई धन्यबाद, आज छुट्टै खुशीको अनुभुती ।’ दाहालले फेसबुकमा लेखेकी छन् ।

नेरामावि अमलेखगञ्जका प्रधानाध्यापक माधव नेपालले सामाजिक सञ्जालमै जागिरे जीवनको पहिलो अनुभव भन्दै खुशी साटेका छन् । ‘जागीरे जीवनको नयाँ अध्याय पालिकाबाट सिधै शिक्षकको खातामा तलब । मुरी मुरी धन्यबाद’ प्रधानाध्यापक नेपालले फेसबुकमा लेखेका छन् ।