२२ चैत २०८१ शुक्रबार | 04 Apr 2025 Fri

दोश्रो डुमरवाना भेट्रान फुटबल प्रतियोगिता चैत्र २३ गतेदेखि सुरु हुँदै



  • नयाँ इतिहास
  • २ दिन अघि
  • पाठक संख्या २०७
  • नारायण पौडेल
    सिमरा : डुमरवाना भेट्रान क्लबको आयोजनामा हुने दोस्रो संस्करणको डुमरवाना भेट्रान फुटबल प्रतियोगिता चैत २३ गतेदेखि सुरु हुने भएको छ। बुधबार आयोजित पत्रकार सम्मेलनमा प्रतियोगिता सम्बन्धी जानकारी दिँदै आयोजकले सम्पूर्ण तयारी पूरा भएको जनाएको छ।

    जीतपुरसिमरा उपमहानगरपालिका–१५ स्थित डुमरवाना खेल मैदानमा आयोजना हुने प्रतियोगितामा बारा, पर्सा, मकवानपुर, र सर्लाहीका १२ टिमको सहभागिता रहनेछ। आयोजक क्लबका सचिव लालबहादुर गुरुङका अनुसार लक्ष्मीनाथ भेट्रान सर्लाही, विकासशील भेट्रान सिमरा, त्रिशुल भेट्रान बकुलिया, बगही भेट्रान पर्सा, खैरवा भेट्रान, नागस्वोती भेट्रान हेटौंडा, सिमरा भेट्रान, नव जनजागृति भेट्रान क्लब, निजगढ भेट्रान, वीरगन्ज भेट्रान तथा आयोजकका दुई टिमले प्रतियोगितामा प्रतिस्पर्धा गर्नेछन्।

    प्रतियोगिता चैत ३० गतेसम्म सञ्चालन हुनेछ। विजेता टिमले एक लाख रुपैयाँ प्राप्त गर्नेछ भने उपविजेताले ५० हजार रुपैयाँ पुरस्कार पाउनेछ। त्यस्तै, सर्वाधिक गोलकर्ता खेलाडीलाई पाँच हजार, उत्कृष्ट खेलाडी र उत्कृष्ट गोलरक्षकलाई जनही दुई हजार पाँच सय रुपैयाँ पुरस्कार प्रदान गरिने आयोजक क्लबका सल्लाहकार संयोजक राजु तिमिल्सिनाले जानकारी दिए।

    प्रतियोगितालाई जीतपुरसिमरा उपमहानगरपालिकाले एक लाख तथा वडा नं. १५ कार्यालयले एक लाख रुपैयाँ सहयोग गर्ने भएका छन्। साथै, मौसम चियापत्ती, प्रोग्रेश एकेडेमी, सन्तुष्टी होटल, शिवशक्ति घ्यूलगायत विभिन्न व्यवसायिक संस्थाहरूले पनि सहयोग गरेका छन्।

    प्रतियोगिताका खेलहरू मधेस स्पोर्ट्स खेलकुद पेजमार्फत प्रत्यक्ष प्रसारण गरिनेछ।

    डुमरवाना भेट्रान क्लबका अध्यक्ष मनोज चौधरीको अध्यक्षतामा सम्पन्न पत्रकार सम्मेलनमा वडाध्यक्ष रामप्रसाद लामिछाने, वडासदस्य रामेश्वर चौधरी, मनमाया घले, लोकतान्त्रिक खेलकुद संघ बाराका अध्यक्ष ओम (बाबु) पाण्डे, मौसम चियापत्तीका कन्ट्री म्यानेजर इश्वर दवाडी, कपिल लामिछाने, डिलर प्रमुख शिशुपाल चौधरीलगायतको उपस्थिति रहेको थियो।

    पत्रकार सम्मेलनको सहजीकरण संचारकर्मी प्रदीप गौतमले गरेका थिए भने स्वागत मन्तव्य भरत पौडेलले दिएका थिए।