कर्मचारी रुवाउँदै जीतपुरसिमरा : एक अधिकृत सात महिनादेखि जिम्मेवारी विहीन

नयाँ इतिहास

२ महिना अघि

पाठक संख्या ११७३

सिमरा : जीतपुरसिमरा उपमहानगरपालिकाले गत असार मसान्तबाट एक अधिकृतलाई जिम्मेवारी विहीन बनाएर ‘मानसिक यातना’ दिईरहेको छ ।

प्रमूख प्रशासकीय अधिकृत उर्मिला काफ्लेले व्यक्तिगत विषयमा इगो राखेर अधिकृत बालाराम खड्कालाई जिम्मेवारी विहीन बनाएको आरोप छ । अधिकृत खड्कालाई उपमहानगरको ६ नम्बर वडा कार्यालयमा वडा सचिबका रुपमा काम गर्न खटाइएको थियो तर उनलाई वडा कार्यालयले हाजिर गर्न नदिएपछि उनले उपमहानगरमै हाजिर गरिरहेका छन् । वडा कार्यालयले अधिकृत खड्कालाई हाजिर नगराउने जानकारी गराएपनि प्रमूख प्रशासकीय अधिकृत काफ्लेले उनलाई अर्को जिम्मेवारी नतोक्दा सात महिनादेखि अधिकृत खड्का जिम्मेवार विहीन भएर मानसिक यातना खेपिरहेका छन् । 

गत असार मसान्त अघिसम्म उपमहानगरको योजना शाखा प्रमूखको जिम्मेवारीमा रहेका खड्काको जिम्मेवारी आर्थिक बर्ष २०८१।८२ को शूरुवातबाटै खोसेर शाखा विहीन बनाईएको हो । उनीसंगैका सबै अधिकृत आ–आफ्नो शाखागत जिम्मेवारीमा रहँदा खड्का भने हाजिर गरेर कहिले यता कहिले उता भौंतारीन बाध्य छन् । 

उनको जिम्मेवारी खोसीनुको कुनै स्पष्ट कारण समेत उनलाई प्रमूख प्रशासकीय अधिकृत काफ्लेले दिएकी छैनन् यति सम्मकी गत भदौमा मधेश प्रदेशले ल्याएको स्थानीय सेवा ऐन २०८१ को व्यवस्था बमोजिम सातौं तहमा मिलान भएको पत्र समेत उनलाई दिईएको छैन । 

गत असारमा उपमहानगरको नगर सभाका विषयमा नगर प्रमूख र उपप्रमूख पक्ष विच विवाद भएको थियो । प्रमूख प्रशासकीय अधिकृत काफ्लेले नगर प्रमूखको पक्ष लिएको आरोप लागिरहेका समयमा अधिकृत खड्काले फेसबुकमा लेखेको एउटा स्टाटसका कारण उनीविरुद्ध प्रमूख प्रशासकीय अधिकृत काफ्ले आगो भएकी हुन् । 

उनले फेसबुकमा ‘कुनै व्यक्ति प्रति अन्धभक्त आशक्ति हुनुमा दुईवटा कारण हुन्छ एउटा आर्थिक सम्बन्ध, अर्को यौन सम्बन्ध’ उनले आफ्नो व्यक्तिगत सञ्जालमा लेखेको स्टाटसलाई केहि स्थानीय सञ्चारमाध्यमले प्रमूख प्रशासकीय अधिकृत काफ्ले र मेयर राजन पौडेलको निकटतासंग जोडेर व्याख्या गरेका थिए । पछि खड्काले आफ्नो व्यक्तिगत विचारलाई गलत व्याख्या गरिएको उजुरी दिएपछि केहि सञ्चारमाध्यमले खण्डन समेत प्रकाशन गरेका थिए । त्यसकै आधारमा अधिकृत खड्कालाई सात महिनादेखि घरको न घाटको बनाईएको हो । 

प्रमूख प्रशासकीय अधिकृत उर्मिला काफ्ले र अधिकृत खड्काविच शुरुमा निकै निकट सम्बन्ध थियो । गत वैशाख अन्तिममा उपमहानगरको प्रमूख प्रशासकीय अधिकृतका रुपमा काफ्ले हाजिर हुँदा अधिकृत खड्का योजना शाखा प्रमूखको जिम्मेवारीमा थिए । काफ्लेले आफ्नो अनुपस्थितीमा १० लाख रुपैयाँसम्मको योजना स्वीकृत गर्ने आर्थिक अख्तियारी समेत खड्कालाई दिएकी थिइन् । स्रोतका अनुसार त्यो अख्तियारी अझै फिर्ता लिएकी छैनन् । तर ‘मन नपरेपछि सास पनि गन्हाउँछ’ भन्ने नेपाली उखान जस्तै काफ्लेलाई अधिकृत खड्काको छायाँ किन मन पर्न छोड्यो त्यो उनैले जानुन् । 

तर उपमहानगरका नगर प्रमूख राजन पौडेल, उपप्रमूख भोलाप्रसाद अधिकारी सहितका जनप्रतिनिधीहरु एकजना अधिकृत जस्तो जिम्मेवार कर्मचारीमाथी भएको ज्यादतीका विषयमा चुँइक्क नबोल्नु चाँही गम्भीर विषय हो । आफ्नै सहकर्मी कर्मचारी माथी भएको ज्यादतीपूर्ण व्यवहारलाई नजरअन्दाज गरिरहेको संस्थामा कुन मनोबलले कर्मचारीले काम गर्लान् ?  यो विषयमा ध्यान दिने कि जनप्रतिनिधीज्यू ?