बजेट संसोधन गर्दै जीतपुरसिमरा, वडाको सिलिङ बढाईयो (कुन वडामा कति सूची सहित) 

सिमरा : बाराको जीतपुरसिमरा उपमहानगरपालिकाले अन्ततः वडाको बजेट बढाउने निर्णय गरेको छ । 

गत असारमा सम्पन्न दशौं नगर सभाले ल्याएको बजेट संसोधनका लागि आगामी ९ चैतमा जीतपुरसिमरा उपमहानगरको हिउँदे नगर सभा बस्दैछ । ११ औं नगर सभाका लागि वडागत बजेटमा असन्तुष्ट समुहलाई सहमतीमा ल्याउन नगर प्रमुख राजन पौडेल वडागत बजेटको सिलिङ २७ करोड पुर्‍याउन सहमत भएपछि नगर सभाको मिति तोकिएको हो । 

दशौं नगर सभाका विरुद्ध अदालत पुगेको उपप्रमुख भोलाप्रसाद अधिकारी पक्षधर जनप्रतिनिधि पनि वडास्तरीय बजेटको सिलिङ बढ्ने भएपछि नगर सभाबाट बजेट संसोधन तथा बजेट बाँडफाँडका लागि सहमत भएका छन् । 

अघिल्लो आर्थिक बर्ष २०८०।८१ मा ३२ करोड रुपैयाँको वडास्तरीय सिलिङ तोकिएकोमा नगर प्रमुख राजन पौडेलले गत असारमा ल्याएको आर्थिक बर्ष २०८१।८२ को बजेटमा उक्त सिलिङ १२ करोडमा सिमित राखेका थिए । वडास्तरीय बजेट साना योजनाहरुमा खर्च हुने र त्यसको प्रभावकारीता नहुने तर्क गरेका नगर प्रमुख पौडेल आँफैले ल्याएको बजेट संसोधन मार्फत नौ महिनापछि वडाको सिलिङ २७ करोड पुर्‍याउन सहमत भएपछि उपमहानगरमा जनप्रतिनिधि विच बढेको दुरी र संवादहिनताको वातावरण अन्त्य हुने देखिएको छ ।   

बजेटको बैज्ञानिक बाँडफाँड विधी अपनाईयो 

चालु आर्थिक बर्षको बजेट ल्याउँदा एकलौटी निर्णय गरेको आरोप खेपेका नगर प्रमुख पौडेलले संसोधित बजेट विवादरहित बनाउने प्रयास गरेका छन् । जसका लागि बजेट बाँडफाँड वैज्ञानिक बनाउने प्रयास यसपटक गरिएको छ । वडाको कुल २७ करोड सिलिङलाई दुई भागमा बाँडी आधा रकम अर्थात १३ करोड ५० लाख रुपैयाँ सबै वडालाई दामासाही ढंगले वितरण गरिएको छ । यसरी वितरित १३ करोड ५० लाख रुपैयाँमा २४ वटै वडाले ५६ लाख २५ हजार रुपैयाँ प्राप्त गरेका छन् । 

बाँकी १३ करोड ५० लाखलाई शतप्रतिशत मानि सो रकम बाँडफाँडका लागि विभीन्न सुचकाङ्कहरु निर्धारण गरिएको छ जस अन्तर्गत भुगोल, जनसंख्या, वडाको राजश्व संकलन, उपभोक्ता समितिहरुको गठन, पूर्वाधार विकास लगायतलाई आधार मानिएको छ । अघिल्लो आर्थिक बर्षको बजेट खर्च गर्दा कोटेशन मार्फत गरेका वडाहरुको बजेट कटौती गरिएको छ भने कोटेशन विधी नअपनाएका वडाहरुलाई प्रोत्साहन बजेट प्रदान गरिएको छ । 

उपमहानगरका २४ वडाहरु मध्य क्षेत्रफलका आधारमा ठुला र साना वडाहरुको बजेटको आकार सोही अनुसार ठुलो र सानो बनाईएको छ । राष्ट्रिय जनगणना २०७८ को जनगणनामा बढी जनसंख्या भएका वडाको बजेट र कम जनसंख्या भएका वडाको बजेट आकार सोही अनुसार कायम गरिएको छ । अघिल्लो आर्थिक बर्षहरुमा वडागत राजश्व संकलनमा अगाडी रहेका वडाहरुले बढी र कम राजश्व संकलन गर्ने वडाहरुले कम बजेट प्राप्त गरेका छन् ।  

नगर प्रमुख राजन पौडेलका अनुसार आन्तरिक राजश्व संकलनमा वडाहरुलाई सक्रीय बनाउने उद्देश्यले राजश्व संकलनका आधारमा पनि बजेट सिलिङ तोकिएको हो । ‘आगामी दिनमा बढी राजश्व उठाउने वडा र कम राजश्व उठाउने वडाको बजेट सोही अनुसार निर्धारण गर्न सहयोग पुग्ने गरी बजेट बनाईएको छ’ नगर प्रमुख पौडेलले नयाँ इतिहासंग भने ।

यस्तो छ बाँडफाँडको आधार

१३ करोड ५० लाख रुपैयाँलाई शत प्रतिशत मानी त्यसको ३० प्रतिशत जनसंख्याका आधारमा वितरण गरिएको छ । २० प्रतिशत रकम भुगोलका आधारमा, ३० प्रतिशत रकम राजश्व संकलनका आधारमा वितरण गरिएको छ । २० प्रतिशत रकम पूर्वाधार विकासका आधारमा वितरण गरिएको छ । अघिल्लो आर्थिक बर्षमा सम्झौता भएका योजनाहरुका आधारमा वितरण गरिएको २० प्रतिशतले हुन आउने २ करोड ७० लाख रुपैयाँमा पनि कोटेशन अपनाएका वडाको १५ प्रतिशत रकम घटाई कोटेशन नअपनाउने पाँच वडालाई दामासाहीमा थप प्रोत्साहन बजेट प्रदान गरिएको छ । अघिल्लो आर्थिक बर्षमा कोटेशन विधी नअपनाउने वडा नम्बर २, ३, १६, २१ र २२ ले थप ८ लाख १० हजार रुपैयाँ प्रोत्साहन बजेट पाएका छन् । 

‘कोटेशन मार्फत हुने कामलाई निरुत्साहित गर्ने उद्देश्य राखिएको छ, जसले वडामा हुने बजेट दुरुपयोगमा सघाउने विश्वास लिएका छौं’ नगर प्रमुख राजन पौडेलले नयाँ इतिहाससंग भने ।
 

हेर्नुहोस् कुन वडालाई कति बजेट 

वडा नम्बर १ - एक करोड ४८ लाख ६७ हजार चारसय ६६ रुपैयाँ

वडा नम्बर २ - एक करोड ५३ लाख दुई हजार ९ सय ५९ रुपैयाँ

वडा नम्बर ३ - एक करोड सात लाख १२ हजार ४७ रुपैयाँ

वडा नम्बर ४ - एक करोड पाँच लाख ६७ हजार ३१ रुपैयाँ

वडा नम्बर ५ - एक करोड पाँच लाख २१ ह्जार ९ सय ६२ रुपैयाँ

वडा नम्बर ६ - उनन्सतरी लाख ८१ ह्जार ६ सय ८९ रुपैयाँ

वडा नम्बर ७ - एक करोड २५ लाख ८६ हजार ६ सय ३० रुपैयाँ 

वडा नम्बर ८ - एक करोड १४ लाख ९१ ह्जार ४ सय ५ रुपैयाँ

वडा नम्बर ९ - एक करोड एक लाख ६९ हजार ६ सय २३ रुपैयाँ

वडा नम्बर १० - एकानब्बे लाख २४ हजार आठसय ८७ रुपैयाँ 

वडा नम्बर ११ - एक करोड ७ लाख २५ हजार आठसय १० रुपैयाँ

वडा नम्बर १२ - एक करोड ९ लाख ९ हजार ६ सय ३१ रुपैयाँ

वडा नम्बर १३ - चौरासी लाख १२ हजार ५ सय ५४ रुपैयाँ 

वडा नम्बर १४ - एक करोड १३ लाख ४३ हजार ८ सय ६ रुपैयाँ 

वडा नम्बर १५ - एक करोड १४ लाख ५० हजार ३ सय ८९ रुपैयाँ

वडा नम्बर १६ - एक करोड २९ लाख ५८ हजार ३ सय ८० रुपैयाँ

वडा नम्बर १७ - एक करोड १५ लाख २५ हजार १२ रुपैयाँ

वडा नम्बर १८  - एक करोड १७ लाख २ हजार ७ सय ३८ रुपैयाँ

वडा नम्बर १९ - एक करोड ३ लाख ४६ हजार २ सय ८६ रुपैयाँ

वडा नम्बर २० - एक करोड ५ लाख १८ हजार ३ सय ५४ रुपैयाँ

वडा नम्बर २१ - एक करोड ४३ लाख ६८ हजार ८१ रुपैयाँ

वडा नम्बर २२ - एक करोड ५६ लाख २५ हजार ४ सय ५६ रुपैयाँ

वडा नम्बर २३ - पन्चानब्बे लाख ६० हजार ५ सय ४२ रुपैयाँ

वडा नम्बर २४ - बयासी लाख २७ हजार २ सय ६२ रुपैयाँ