महेश खरेलको आगमनले अन्य दलमा डाह, राप्रपामा उत्साह

नयाँ इतिहास

२ महिना अघि

पाठक संख्या ७४०

प्रकाश लम्साल
सिमरा : राष्ट्रिय प्रजातन्त्र पार्टीले संगठन पूर्नसंरचना अभियान सहित जीतपुरसिमरा उपमहानगरको राजनीतिमा नयाँ तरङ्ग सिर्जना गरेको छ । 

संगठन पूर्नसंरचनाका लागि नेतृत्वमा पुस्तान्तरण गरेको राप्रपाले महेश खरेलको अध्यक्षतामा ५१ सदस्यिय नगर कमिटी सर्वसम्मत चयन गरेर स्थानीय राजनीतिमा पहिलो शक्ति बन्ने अभियान शुरु गरेको छ ।

जीतपुरसिमराको राजनीतिक बृतमा अग्रभागमा देखा नपरेका यूवा व्यवसायी महेश खरेलको नेतृत्वमा राप्रपाले नगर कमिटी गठन गरेपछि उपमहानगरमा राप्रपा नयाँ शक्तिका रुपमा उदाएको बहस सिर्जना भएको छ ।

काँग्रेस, एमाले र माओबादी जस्ता ठुला दलप्रति जनतामा बढिरहेको वितृष्णा र यूवालाई भातृ संगठनमा थन्क्याईदिने प्रवृति हावी रहेका बेला नवयूवाको नेतृत्व अघि सारेर राप्रपाले राजनीतिको मुल नेतृत्वमा यूवाको आवश्यक्ता व्यवहारमै उतारेको छ ।

राप्रपाले जोशीला यूवा र पुराना नेता समावेश गरेर ५१ सदस्यिय नगर समिति सर्वसम्मत चयन ग¥यो । जसमा निवर्तमान नगर अध्यक्ष माधव त्रिपाठी सहितका नेताहरु अटाएका छन् । सबै वडाको प्रतिनिधित्व, समानुपातिक तथा समावेशी नेतृत्व चयन गरेर राप्रपाले उपमहानगरको राजनीतिमा एकताको उत्कृष्ट सन्देश समेत दिएको छ । 

विगतका निर्वाचनमा राप्रपालाई प्रतिष्पर्धी नठान्ने काँग्रेस एमाले माओबादी लगायतका दलहरु आगामी निर्वाचनमा राप्रपा बलियो प्रतिष्पर्धी बन्नेमा चिन्तीत बन्न थालेका  छन् । पार्टीहरुको आन्तरिक बैठकमा राप्रपाको चर्चा हुन थालेको छ । ठुला दलहरुको खस्कँदो साखको फाइदा लिएर आगामी निर्वाचन सम्म बलीयो शक्तिका रुपमा स्थापित हुने लक्ष्य राप्रपाले राखेको देखिन्छ । 

जीतपुरसिमराको स्थानीय राजनीतिमा तीन दशकदेखि हाली मुहाली गरिरहेका पुराना अनुहारहरुका लागि चुनौती बनेर राजनीतिमा उदाएका महेश खरेलको व्यक्तित्व, अनुभव र यूवा जोश राप्रपाको संगठन विस्तारमा उपयोगी बनेको छ । राप्रपाले पछिल्लो समय व्यवस्थित रुपमा संगठन विस्तार गरिरहेको छ । 

राप्रपामा पछिल्लो समय उपमहानगरबासीमा बढेको आकर्षण माघ ५ को नगर अधिवेशनमा पनि पुष्टि भयो । यहाँको उपस्थिती देखेर केन्द्रिय अध्यक्ष राजेन्द्र लिङ्देन सहितका नेताहरु उत्साहित भएर काठमाडौं फर्किए । स्वतन्त्र युवाहरु एवं विभिन्न दल परित्याग गरी सयौं मानिसको पार्टी प्रवेशले नेतृत्वलाई उत्साहित बनाएको छ । स्थानीय यूवा विद्यार्थी र व्यवसायीहरु राप्रपामा आकर्षित देखिन्छन् । यूवा संगठन, वडा कमिटि र राप्रपाका विभिन्न भातृ संगठनहरुमा उत्साहजनक रुपमा स्थानीयहरु संगठीत भइरहेका छन् । 

राप्रपा किन ?

जीतपुरसिमरा उपमहानगरपालिका ४ औराहाका महेश खरेल पेशाले व्यवसायी हुन् । स्वदेश तथा विदेशमा सफल व्यवसायीको परिचय बनाइसकेका खरेल जीतपुरसिमराको राजनीतिमा नयाँ अनुहारका रुपमा उदाएका छन् । व्यवसायका सिलसिलामा लामो समय विदेशी भूमिमा रहँदा त्यहाँको विकास क्रमलाई आफ्नै आँखाले देखेका खरेल आफ्नो ठाउँको अवस्था देखेर दिक्क छन् । ‘राजनीति सफा पारे मात्रै समाज सफा हुन्छ’ भन्ने सोंच लिएर राजनीतिमा होमीएका खरेलले राजनीति अघि बढाउन राप्रपालाई किन रोजे भन्ने प्रश्नमा उनको छोटो उत्तर छ ‘भ्रष्टाचार गर्न हुँदैन भन्ने सिद्धान्त राप्रपामा मात्रै छ ।’

‘म कमाउन, छोराछोरी पाल्न, धनसम्पत्ती जोड्न राजनीतिमा आएको होइन, मलाई बाँच्न पुग्ने कमाइसकेको छु’ ५० बर्षिय खरेल भन्छन् । नेताहरुले आफू र आफ्ना भावी सन्तानका लागि सम्पती कमाउने भाँडो राजनीतिलाई बनाएको खरेलको बुझाई छ । 

राप्रपाको संगठन विस्तारलाई मुख्य प्राथमिकता दिएका खरेलले उपमहानगरमा राप्रपाप्रति जन–आकर्षण बढीरहेको बताए । ‘म २४ वटै वडामा पुग्दा अब राजनीतिमा राप्रपा प्रति मात्रै जनताको भरोसा छ भन्ने बुझें ।’ खरेलले भने ।

पुराना र नयाँ भनिएका दलहरु दुबैको राजनीतिक उद्देश्य आर्थिक लाभनै रहेको जनताले बुझीसकेको खरेलको भनाई छ । वडादेखि केन्द्रसम्मका जनप्रतिनिधि भ्रष्टाचारमा लागेकाले गणतन्त्र लुट्नका लागि मात्रै रहेछ भन्ने जनताले बुझेको खरेलको तर्क छ । संघीयतालाई दलहरुले आफ्नो कार्यकर्ता पाल्ने भाँडो बनाएकोले देश ऋणमा डुबेको उनी बताउँछन् । ‘वडा कार्यालयको भवन पनि विदेशीसंग ऋण मागेर बनिरहेको छ, त्यसमा पनि वडा सदस्यदेखि मेयरसम्मलाई कमिसन नदिई हुँदैन’ उनको भनाई छ । 

नेताहरु भ्रष्ट हुँदा कर्मचारीतन्त्रको मनोबल बढेकाले नेपालमा भ्रष्टाचार संस्थागत हुँदै गएको खरेलको बुझाई छ । ‘आज वडाध्यक्ष देखि मन्त्री सम्मलाई उनकै कार्यालयका कर्मचारीले हेप्न थालेका छन्, त्यसको प्रमूख कारण भनेको उनीहरुको आर्थिक अनियमितता हो ।’ ‘त्यही कर्मचारीसंग सेटिङमा घुस खानेलाई कसले टेर्छ भन्नुस त ?’ खरेल भन्छन् । नेपालका हरेक कार्यालयमा जानुस आज कर्मचारीलाई पैसा नदिई कसैको काम हुँदैन । के हामीले कल्पना गरेको गणतन्त्र र संघीयता यसकै लागि थियो त ? जनतालाई उनको प्रश्न छ ।

मेयर पदमा उम्मेदवारीको घोषणा
महेश खरेल जीतपुरसिमराको राजनीतिमा नयाँ नाम हुन् तर व्यक्ति जीतपुरसिमरामा परिचीत छन् । स्वदेश तथा विदेशमा सफल व्यवसायीका रुपमा स्थापित खरेलले व्यवसायका क्रममा विदेशमा रहँदा त्यहाँको विकास क्रमलाई आफ्नै आँखाले देखेका छन् । नेपालको राजनीति र स्थानीय तहको कामलाई नजिकबाट बुझेका खरेल स्थानीय राजनीतिमा यूवाको हस्तक्षेप नभई देशको विकास हुन नसक्ने सोंचका साथ राजनीतिमा उदाएका हुन् । 

विदेशमा राजनीतिले गरेको देश विकास र नेपालमा राजनीतिक दलले गरेको देश विनाशलाई खरेलले नजिकबाटै नियालेका छन् । २०८४ को स्थानीय तह निर्वाचनमा जीतपुरसिमरा उपमहानगरपालिकाको मेयर पदमा उम्मेदवार बनेर जनताका माझमा जाने महेश खरेलको योजना छ ।

पार्टीको संगठन विस्तारमा लागिरहेका खरेललाई जीतपुरसिमरा उपमहानगरको मेयर पदमा उम्मेदवारी किन भन्ने प्रश्नमा उनी भन्छन् ‘उपमहानगरको फोहर सफा पार्न’ उनले भनेको फोहर सडकका होइनन् । नीति र बेथितीका फोहर सफा गर्न जीतपुरसिमरा उपमहानगरमा राप्रपाको नेतृत्व आवश्यक छ’ उनी भन्छन् । 
जीतपुरसिमरा उपमहानगरपालिकाका जनप्रतिनिधीहरुले नगरवासीको हितमा काम गर्न नसकेको खरेलको भनाई छ । उपमहानगरका जनप्रतिनिधीहरु आफ्नो कामबाट विमूख भएर हिंडिरहेको खरेलको तर्क छ । ‘सियोले र तरबारले फरक फरक काम गर्ने हो तर यहाँ सियोहरु तरबार बन्न खोजीरहेका छन्’ उनी भन्छन् । जसरी सियोले साना–साना प्वाललाई सिलाउँछ, त्यसरी स्थानीयका साना–साना काममा ध्यान दिनुपर्ने जनप्रतिनिधी ठुल्ठुला गफ दिंदै हिंडेकाले नगरवासीको समस्या समाधान हुन नसकेको उनको तर्क छ । ‘जीतपुरसिमराको शिक्षा, स्वास्थ्य, कृषि, उद्योग सबैतिर समस्या मात्रै छ तर जनप्रतिनिधी ढलानमा कमिसन खोजेर बसिरहेका छन्’ खरेल भन्छन् । 

कमिसनको हिसाब नमिल्दा जीतपुरसिमराका जनप्रतिनिधीहरु आन्तरिक कलहमा ब्यस्त रहेको खरेलको आरोप छ । ‘नगर सभामा कुर्सी फोडेर झगडा गर्नेहरु संग तपाँइ के अपेक्षा राख्नुहुन्छ?’ उनी प्रश्न गर्छन् । अघिल्लो साल जिताएका जनतासामु अर्को चुनाबमा कुन मुख लिएर भोट माग्न जानुहुन्छ हाम्रा जनप्रतिनिधीहरु, हिजो जीतपुरमा कुर्सी फोडेको, कुटाकुट गरेको घटनाको उद्देश्य के थियो जनतालाई भन्नु पर्दैन ?’ जनप्रतिनिधीलाई उनको प्रश्न छ ।

(महेश खरेलसंगको कुराकानीमा आधारित)