२ किलोमिटर टाढाको विमान/ड्रोन नष्ट गर्न सक्ने लेजर हतियार बनाएको युक्रेनको दाबी

नयाँ इतिहास

३ महिना अघि

पाठक संख्या १०१

काठमाडौं : युक्रेनले दुई किलोमिटर अर्थात् १.२ माइलको उचाइसम्म उडिरहेको विमान/ड्रोन नष्ट गर्न सक्ने लेजर हतियार विकास गरेको दाबी गरेको छ । युक्रेनका एक सैन्य अधिकृतले हालै सम्पन्न रक्षा सम्मेलनमा यस प्रकारको हतियार विकास गरेको दाबी गरेका हुन् ।

उनका अनुसार उक्त लेजर हतियार अहिले नै प्रयोग गर्न सकिने अवस्था छ । युक्रेनले आफ्नो राष्ट्रिय प्रतीक त्रिशूलबाट प्रेरणा लिएर हतियारको नाम ‘ट्राइजुब’ (Tryzub) राखेको छ । यसको अर्थ स्वतन्त्रता, शक्ति र एकताको प्रतीक भएको बताइएको छ । 

लेजर हतियारबारे युक्रेनले विस्तृत जानकारी नदिए पनि विशेषज्ञहरूले उसँग यस्तो हतियार हुनसक्ने अनुमान गरेका छन् । अमेरिकी नौसेनाले प्रयोग गर्दै आएको लेजर वेपन्स सिस्टम (एलडब्लुएस) प्रविधिबाट युक्रेनले ट्राइजुब तयार पारे उनीहरूको विश्लेषण छ ।

विशेषगरी लेजर हतियारले रुसले प्रयोग गर्दै आएको शाहेद १३६/जेरेन २ (Shahed-136/Geran-2) जस्ता कम उचाइमा उड्ने ड्रोनहरूलाई सजिलै नष्ट गर्न सक्ने बताइएको छ । तर यस्तो ‍प्रणालीले उच्च गतिका ताप प्रतिरोधक ब्यालिस्टिक मिसाइलहरूलाई नष्ट गर्न सक्ने छैनन् ।

हालसम्म अमेरिका, चीन, इजरायल, बेलायत लगायतका शक्ति राष्ट्रले मात्र यस्ता लेजर प्रणालीको विकास गरेका छन् । यस्तोमा राजनीतिक विश्लेषकहरूले भने युक्रेनले यस्तो शक्तिशाली हतियारको विकास गरेर रुसविरुद्धको लडाइँमा रणनीतिक लाभ लिन खोजेको विश्लेषण गरेका छन् ।