जीतपुरसिमरा नगर अधिवेशनको तयारीमा एमाले, माओबादी र राप्रपा, कसरी छान्दैछ नेतृत्व ?

नयाँ इतिहास

३ महिना अघि

पाठक संख्या ६३२

नारायण पौडेल
सिमरा : नेकपा एमाले सहित तीन राजनीतिक दलको स्थानीय नेतृत्व जीतपुरसिमरा नगर अधिवेशनको तयारीमा जुटेको छ । 

नेकपा एमालेले पौष मसान्त भित्रै नगर अधिवेशन गरेर नयाँ नेतृत्व चयनको तयारी थालेको छ । यद्यपी मिति भने तय भइनसकेको जीतपुरसिमरा उपमहानगरपालिकाका नगर उपप्रमुख समेत रहेका एमाले नगर अध्यक्ष भोलाप्रसाद अधिकारीले जानकारी दिए । 

जीतपुरसिमरा उपमहानगरपालिकाको नेतृत्व गरिरहेको नेकपा माओबादी केन्द्रले आगामी माघ १६ गतेका लागि नगर अधिवेशनको मिति तय गरेको माओबादी केन्द्रका नगर अध्यक्ष प्रेम बरालले जानकारी दिए । बरालका अनुसार नगर अधिवेशनको उद्घाटनका लागि पूर्व प्रधानमन्त्री एवं माओबादी अध्यक्ष पुष्पकमल दाहाल प्रचण्ड आउने भएकाले निर्धारित मितिमा १/२ दिन हेरफेर पनि हुन सक्छ । 

राष्ट्रिय प्रजातन्त्र पार्टी (राप्रपा) ले आगामी माघ ५ गतेका लागि जीतपुरसिमरा नगर अधिवेशनको मिति तय गरिसकेको छ । नगर अधिवेशनलाई शक्ति प्रदर्शनको रुपमा समेत प्रस्तुत गर्न लागेको राप्रपाका अध्यक्ष राजेन्द्र लिङदेन सहितका शिर्ष नेता अधिवेशनमा सहभागि हुने गरी नगर अधिवेशनको तयारी भइरहेको राप्रपा जीतपुरसिमराका नेता सुरज लम्सालले जानकारी दिए । राष्ट्रिय प्रजातान्त्रिक युवक संगठनका पूर्व केन्द्रिय सदस्य समेत रहेका नेता लम्सालका अनुसार राप्रपाको जीतपुरसिमरा नगर अधिवेशनलाई पार्टी अध्यक्ष लिङदेन सहित केन्द्रिय प्रवक्ता ज्ञानेन्द्र शाही, खुश्वु ओली लगायतका नेताहरुले सम्बोधन गर्ने कार्यक्रम तय भएको छ । सिमरा बजारमा रहेको वडा नम्बर २ को प्राङ्गणमा बृहत सभा सहित नगर अधिवेशनको उद्घाटन हु्ने कार्यक्रम निर्धारण भइसकेको नेता लम्सालले जानकारी दिए । 

राप्रपामा सर्वसम्मत नेतृत्वको प्रयास

राष्ट्रिय प्रजातन्त्र पार्टीको नेतृत्वका लागि अहिलेसम्म एकजनामात्रै आकाँक्षीको नाम आएकाले सर्वसम्मत नेतृत्व चयनको सम्भावना बढी रहेको छ । राप्रपाका युवा नेता महेश खरेललाई स्थानीय नेताहरुले नगर अध्यक्षकै रुपमा अघि सार्न पार्टीमा स्वागत गरेकाले नेतृत्वमा अरुले दाबी नगर्ने राप्रपा जीतपुरसिमराका एक नेताले बताए । जीतपुरसिमरा उपमहानगरपालिका ४ औराहाका खरेल यूवा पुस्ता माझ लोकप्रीय छन् । खरेलले जीतपुरसिमरामै बसेर फरक राजनीति गर्नुपर्ने बहस गरिरहेका छन् । राप्रपा नगर कमिटी अध्यक्ष माधव त्रिपाठीले यूवालाई नेतृत्वमा अघि सार्ने चाहना अनुसारनै अघिल्लो महिना खरेललाई राप्रपामा स्वागत गरेका थिए । 

माओबादी केन्द्रमा पाँचजनाको दौडधुप

जीतपुरसिमरा नगर कमिटीको नेतृत्व गर्नका लागि माओबादी केन्द्रमा पाँचजना आकाँक्षीको दौडधुप बढी देखिएको छ । अघिल्लो अधिवेशनमा प्रेम बरालसंग पराजित भएका धर्मबहादुर श्रेष्ठ यसपटक पनि अध्यक्ष बन्ने दौडधुपमा लागेका छन् । जीतपुरसिमरा १ का श्रेष्ठ घरजग्गा व्यवसायी हुन् । 

माओबादी केन्द्रको नगर अध्यक्ष बन्ने दौडमा मजदुर नेता बेनीप्रसाद तिमल्सिना पनि छन् । सुर्य नेपाल प्रा.लि.मा कार्यरत तिमल्सिना जीतपुरसिमरा १५ का स्थायी बासीन्दा हुन् । पार्टी निकट मजदुर संगठनको केन्द्रिय नेतृत्व समेत गरिसकेका तिमल्सिना स्थानीय कार्यकर्ता माझ पनि लोकप्रीय छन् । 

माओबादी केन्द्रको नगर अध्यक्ष बन्ने दौडमा रहेका अर्का नेता हुन् जीतपुरसिमरा १४ का भरत भण्डारी । उनी स्थानीय तह निर्वाचनमा जीतपुरसिमरा १४ को वडाध्यक्षमा पराजित भएका थिए । चुनाबमा पराजय व्यहोरेपछि जीतपुरसिमरा उपमहानगरका मेयर राजन पौडेलले राजनीतिक सल्लाहकारका रुपमा नियुक्त गरेर उनलाई राजनीतिक स्पेस दिएकाले उनलाई मेयर निकट उम्मेदवारका रुपमा हेरिएको छ । 

जीतपुरसिमरा उपमहानगरपालिकाको अघिल्लो कार्यपालिकामा सदस्यका रुपमा काम गरेकी शोभा कार्की माओबादीको नगर अध्यक्षका रुपमा दाबेदारी प्रस्तुत गर्ने एक्लो महिला हुन् । २०७९ को स्थानीय तह निर्वाचनमा जीतपुरसिमरा २ को वडा सदस्यमा पराजित कार्की डेढ दशक अघिदेखि निरन्तर राजीनितीमा कृयाशिल महिला हुन् । पार्टी निकट महिला संगठनको जिल्ला तहमा रहेर काम गरिसकेकी कार्की जीतपुरसिमरा उपमहानगरमा लोकप्रीय एवं अनुभवी महिला नेतृ हुन् । 

जीतपुरसिमरा उपमहानगरपालिकाका पूर्व वडाध्यक्ष मोहित चौधरीले पनि नगर कमिटीको अध्यक्षमा दावेदारी प्रस्तुत गरेका छन् । जीतपुरसिमरा ५ बक्ुलीयाका चौधरी २०७९ को निर्वाचनमा भने वडाध्यक्षमा पराजित भएका थिए ।  

एमालेमा यूवा आकाँक्षी धेरै, प्रतिनिधी चयन बाँकी

नेकपा एमालेको नेतृत्व चयनका लागि आसन्न नगर अधिवेशनबाट अध्यक्ष बन्ने दौडमा यूवा आकाँक्षी बिच प्रतिष्पर्धा हुने सम्भावना छ यद्यपि निर्वाचन प्रकृया र पार्टी सदस्यता प्रमाणीकरण बाँकीनै भएकाले अहिलेनै यसो हुन्छ भन्न सक्ने अवस्था नरहेको एमाले नेता मनोज पौडेलले जानकारी दिए । एमाले मधेश प्रदेशका सचिब समेत रहेका नेता पौडेलका अनुसार पार्टीको नगर अधिवेशनको तयारी स्थानीय नेतृत्वले गरिरहेको भएपनि सदस्यताको टुङ्गो लाग्न बाँकीनै भएकाले निर्धारित मिति भित्र अधिवेशन सम्पन्न हुने सम्भावना न्युन छ ।