चन्द नेतृत्वको नेकपाद्वारा ‘झापा–कञ्चनपुर जनमार्च’ घोषणा

नयाँ इतिहास

३ महिना अघि

पाठक संख्या १६२

काठमाडौं : नेत्रविक्रम चन्द नेतृत्वको नेपाल कम्युनिष्ट पार्टीले भ्रष्टाचार, वैदेशिक हस्तक्षेप, सुकुम्बासी समस्या, मिटरब्याज र ऋण आतंक जस्ता मुद्दाहरूमा जनचेतना र संघर्षका लागि फागुन २१ देखि झापा–कञ्चनपुर जनमार्च सञ्चालन गर्ने घोषणा गरेको छ।

पार्टीका प्रवक्ता खड्गबहादुर विश्वकर्माले मंगलबार काठमाडौंमा आयोजित पत्रकार सम्मेलनमा केन्द्रिय समितिको निर्णयहरू सार्वजनिक गर्दै अभियानको उद्देश्य र कार्यक्रमबारे जानकारी दिए।

प्रवक्ता विश्वकर्माका अनुसार जनमार्चका दौरान पार्टी महासचिव, प्रवक्ता, केन्द्रिय समिति सदस्य, जनवादी संगठित मोर्चा (ज.व.स.), सामना सांस्कृतिक परिवारका प्रतिनिधिसहितको टोली सहभागी हुनेछ। अभियानले निम्न मुद्दाहरूमा जनचेतना फैलाउनेछः

• भ्रष्टाचार र कमिशनखोरीविरुद्ध जनसंघर्ष।
• मिटरब्याज र बैंक ब्याज आतंकको भण्डाफोर।
• सुकुम्बासी, गरिब किसान, महिला, श्रमिकविरुद्धको दमनको प्रतिरोध।
• युवा पलायन रोक्न जागरण अभियान।

बैठकले क्रान्तिकारी पार्टीहरूबीच एकता र सहकार्यलाई प्राथमिकतामा राख्दै क्रान्तिकारी ध्रुवीकरणलाई तीव्रता दिने निर्णय गरेको छ।

पार्टीले २०८४ को निर्वाचनलाई विशेष प्राथमिकतामा राख्दै राष्ट्रिय स्वाधीनता, उत्पीडित वर्ग, जाति, समुदाय, महिला र युवा–विद्यार्थीका मुद्दालाई केन्द्रमा राखेर नेपाली विशेषताको समाजवादको पक्षमा जनमत जुटाउने योजना बनाएको छ। यसका लागि पार्टी दर्ता गरी उपयुक्त चुनाव चिह्न लिने निर्णय पनि भएको छ।